Nueva donación al Archivo Histórico del PCE

“José Gómez Alén, historiador e presidente da Fundación 10 de marzo, preparou esta nova entrega da colección Crónica, As CC.OO. de Galicia e a conflictividade laboral durante o franquismo, que constitúe a primeira historia sistemática sobre o sindicato de CC.OO. de Galicia durante a etapa franquista. Utilizando unha grande variedade de fontes documentais primarias: fundamentalmente actas de xurados de empresa; prensa, tanto legal como clandestina; expedientes de avogados laboralistas; documentación de empresas; e numerosas testemuñas orais a cargo dos protagonistas. O autor tenta recuperar así a memoria histórica daqueles homes e mulleres que aportaron o seu compromiso individual á construcción dun proxecto colectivo que servise como instrumento de loita socio-laboral para o conxunto dos traballadores. As CC.OO. de Galicia e a conflictividade laboral durante o franquismo proporciona unha aproximación global ó estudio da conflictividade industrial e da oposición obreira ó franquismo, buscando, tanto a reconstrucción dese proceso histórico, como de senta-los alicerces para futuros estudios de carácter monográfico ou local sobre as condicións ás que estaban sometidos os traballadores industriais durante o período de estudio, que abrangue desde o remate da guerra civil atao ano 1978, cando serecoñeceu a liberdade sindical. O libro de Gómez Alén subliña que a reconstrucción do movemento obreiro galego e o rexurdimento da conflictividade laboral de carácter colectivo están vencellados á aparición e consolidación dunha nova forma de organización sindical que rompe coas tradicións: as Comisións Obreiras. Sinala, tamén o autor, a dureza das condicións de traballo nas factorías e a influencia que sobre elas exerceu a introducción de novas formas de organización do traballo, deténdose, especialmente, na reconstrucción dos fenómenos de maior conflictividade, como foron os acaecidos en Vigo e Ferrol durante o ano 1972.”